Be Ebarat-e- Digar

سفارت دولت پیشین افغانستان در تاجیکستان، تحت مدیریت محمد ظاهر اغبر به یکی از پایگاه‌های مهم مخالفت با طالبان در سطح منطقه و جهان تبدیل شده است. آقای اغبر که از چهره‌های نزدیک به جبهه مقاومت ملی افغانستان به رهبری احمد مسعود است، در گفت و گو با ضیا شهریار از یکی از تازه‌ترین اقدامات خود، پاره‌کردن مکتوب حکومت طالبان در مورد معرفی یک نماینده از سوی کابل در تاجیکستان دفاع می‌کند و می‌گوید: « فکر می‌کنم به گروهی که آدم می‌کشد، گروهی که هنوز هم در لیست سیاه ملل متحد است، آن جواب دیپلماتیک لازم بود که من انجام دادم». با این وجود او تاکید می‌کند که جنگ راه حل نیست و ضمن تشکر از دولت تاجیکستان برای کمک‌هایش، می‌گوید که سفارت افغانستان، خانه کوچک همه افغان‌هاست: «من هیچوقت نمی‌خواهم که امانت مردم افغانستان را تنظیمی بسازم، یا گروهی بسازم، یا قومی بسازم. تصور نکنید که تاجیکستان مرکز جنگ جبهه مقاومت می‌باشد». گفت و گوی ویژه این هفته با محمد ظاهر اغبر.